غزل : ہر جہت آنکھ کی تیرگی اور میں

ہر جہت آنکھ کی تیرگی اور میں

بے ہُنر زندگی، بے کسی اور میں

دلربا پھول کی اک مہک اور تو

درد کی اک کھلی چاندنی اور میں

آنکھ میں دور تک درد کا رتجگا!

بے سبب رات کی خامشی اور میں

آس کی سیج پر موسموں کی دھنک

روزوشب درد کی رُت نئی اور میں

حوصلہ بے نمو، بے شرر خواہشیں

بے محل اک زمیں گھاس کی اور میں

بے ہوا بے مکاں، جسم کا سائباں

بے بدن ذات کی آگہی اور میں

بے جھجک آنکھ کی دور سے گفتگو

بے قبا حسن کی سادگی اور میں

بے ثمر ٹہنیاں آس کی، خواب کی

بے نوا شام کی راگنی اور میں

بے سماں آئینے دھند کی صورتیں!

بے زباں آنکھ کی روشنی اور میں

______________

 

Ghazal by Rashid Fazli

 

غزل : شورش دو جہان سے نکلا

شورش ِ دو جہان سے نکلا

جب دھواں میری جان سے نکلا

تو بھی کچھ مجھ سے بدگمان رہا

میں بھی تیرے گمان سے نکلا

کوئی ٹوٹا، گلی میں شور ہوا

میں بھی اپنے مکان سے نکلا

خوبصورت سی ایک آہٹ پر

جوگی اپنے دھیان سے نکلا

ڈوبنے کی ہوس کسے تھی یہاں

پانی اونچا نشان سے نکلا

اپنی چاہت خرید کر اک شخص!

بے حسی کی دکان سے نکلا

_____________

A Ghazal by Rashid Fazli

نظم : کس سے کہوں

اب تو آنکھیں مانگتی ہیں

میرے خوابوں کا خراج

خواب جو اپنے نہیں،

پھر وہی احساس جاگا

گوش مانگے کا سماعت کا صلا

لب، مرے الفاظ کی فہرست لے کر

دل کے ارمانوں کا سارا آئینہ

آنکھ کی پتلی میں رکھ دیگا ابھی

سوچتا ہوں، قرض کس کا

کس طرح چکتا کروں

ہو سکے تو خود کو میں

دیوار سا اندھا کروں

روز و شب کی بے حسی

آج سے پیدا کروں!! 

__________________

 

Rashid Fazli Poetry

 

نظم : سفر

وہی آدمی ہے
جو پہلے بھی مجھ سے سفر میں ملا تھا
اچانک کسی اجنبی یاد کی
ایک بے رنگ و بے نور دہلیز پر
اکیلا مجھے چھوڑ کر چل دیا تھا
وہی آدمی ہے
سفر سے جو پہلے
اکیلا کھڑا تھا
"مجھے ڈھونڈتا تھا"
مگر میں نہیں ہوں
کئی سال پہلے
سفر نے مجھے ہر
جُڑی چوکھٹوں سے
الگ کر دیا ہے!!

________________

Safar : the Journey by Rashid Fazli

نظم : تنہائی

تنہا دو مسافر ہیں

رات کے اندھیرے میں…..

ریل چلتی رہتی ہے! 

_____________

Tanhai by Rashid Fazli

نظم : درد

لفظ لفظ خاموشی،

کہہ رہی ہے آنکھوں کی

درد جو تمہارا ہے، میرے دل کا حصہ ہے……!!

______________

Dard, the Pain : Rashid Fazli Poetry

 

نظم : شاعر کی آواز

دل میں کس کے سرسوں پھولی؟

آنکھ مچولی کس نے کھیلی؟

شاعر کی آواز رکے تو یگ بیتا،

تو تنہا ہے!!! 

_______________

Rashid Fazli Poetry

نظم : ہجومِ پیہم

درد کے مسافر کا

اک ہجومِ پیہم ہے

زندگی کی پٹری پر، ریل چلتی رہتی ہے.....! 

____________

Rashid Fazli Poetry